Friday, March 29, 2024
Homeकृषीजनभूमी विशेष लेख : मधमाशी आणि शेती

जनभूमी विशेष लेख : मधमाशी आणि शेती

मधमाश्या नष्ट झाल्या कि चार वर्षात मानव नष्ट होईल अस म्हटलं कि लोक विचारतात कस बर… हे वाक्य आहे थोर शास्त्रज्ञ अल्बर्ट आईन्स्टाईन याचं, ते सांगतात कि मधमाशी विविध प्रकारच्या वनस्पतीचे परागीभवन करीत असतात, बरीच फळझाडे, फुलझाडे, भाजीपाला, धान्य पिके याचं परागीभवन फक्त मधमाश्याच करू शकतात. जर यांचं प्रमाण कमी होत गेल तर आपल्या खाद्यातील अनेक घटक नष्ट होतील आणि मग वनस्पतीच्या अनेक प्रजाती नष्ट होऊन, अन्नधान्याचा तुटवडा निर्माण होऊन भूकबळी वाढतील आणि मग अन्नही मिळणार नाही.

अश्या अनेक बाबी त्यांनी जगासमोर मांडल्या आहेत. विशेष म्हणजे जे अन्न परागीभवन होऊन येत नाही ते खाण्यासाठी सुद्धा जास्त पौष्टिक नसते. हायब्रीड अन्न खाऊन आपली शाररीक क्षमता विकास व मानसिक क्षमता विकास होत नाही हे जगासमोर आल आहे. जगण्याच्या स्पर्धेत आपण हरवून बसलोय. मात्र पुढील पिढीला अतिशय कुमकुवत करीत आहोत. शारीरीक क्षमता नसल्याने मानव आपली पुढील पिढी वाढवू सुद्धा शकणार नाही असे भाकीत होत आहे. भूतान सारखा देश धनुर्विद्या शिकताना शाळा सुद्धा शिकत नाहीत, मात्र आवडीनुसार जगतात आणि आनंदी व समाधानी जगतात हे विशेष.

आपण बारकाईने पाहिल्यास अलीकडील काळात अनेक डाळिंब बागायतदार मधमाश्याच्या पेट्यांच्या शोधात असतात. कारण डाळींब असे झाड आहे कि, याचे परागीभवन फक्त मधमाश्याच करू शकतात. जर मधमाश्या नसतील, तर डाळिंबाच्या फुलांचे रुपांतर फळात होतच नाही. कारण याची नर व मादी फुले वेगवेगळी असतात आणि मग मधमाश्या एका फुलामधील नर पराग उचलून मादी फुलावर सोडण्याचे महत्वाचे काम करतात आणि फक्त मधमाश्याच हे काम करू शकतात, हे आजच्या जगाला समजले आहे. मात्र मधमाश्यांना काय आवडते हे आपण शिकत नाही, तिला पोळे करायला कुठली झाडे आवडतात, पराग व मकरंद गोळा करायला कुठली झाडे आवडतात.

आपल्यापैकी बहुतेकजण हिमाचल प्रदेशात फिरायला जातात, मात्र मनालीच्या पायथ्याशी अनेक गावे आहेत कि जिथ अगदी २०० वर्षांपूर्वी पासून मधमाशी पालन करीत आहेत, हे कधीच पाहत नाहीत, खरतर आपल पर्यटन हे शाश्वत व ग्रामीण भागाला उर्जा देणारे असले पाहिजे. मात्र असे होताना दिसत नाही. अर्थात मधमाशी पालन २०० वर्षपूर्वी, ते पण शास्त्रीयदृष्ट्या पालन केल्याचे आढळून येते. ते लोक आपल्या राहत्या घरात मधमाश्या पालन करीत आहेत आणि दरवर्षी १० किलो मध विकतात आणि ३ किलो मध स्वतःसाठी ठेवतात. मात्र खरतर हे करण्याचा उद्देश परागीभवन हा असून अनेक पिके यावर अवलंबून आहेत. आणि हे सगळ त्या मधमाश्यांनी सुद्धा स्वीकारले आहे. यात ही माणस त्यांना अती थंडीत गुळाचा व साखरेचा पाक करून ठेवतात. काहीजण तर गोळा केलेला मधसुद्धा ठेवतात.


आपल्याला वाटत आपणच शेती करतो मात्र मुंग्या, मधमाश्या, कीटक, गांडुळे, वटवाघळ, साप, पक्षी असे सर्वच जीव शेतकऱ्याला शेती करण्यासाठी मदत करीत असतात. यात सर्वात आघाडीवर मधमाश्या आहेत हे विसरून चालणार नाही. कारण फुलांचे फळात रुपांतर करण्यात मधमाश्या पटाईत असतात, त्यांच्याशिवाय दुसरे कीटक हे काम करूच शकत नाहीत, अगदी डाळिंब, काकडी, सफरचंद अशी अतिशय महत्वाची फळे आपण फक्त जगात मधमाशा आहेत तोपर्यंतच करू शकतो हे वेळीच जगाने लक्ष्यात घेणे गरजेचे आहे.

मधमाश्यांची बदलती जीवनशैली यावर अनेक बाबी समोर येत आहेत, अगदी लहानपणापासून यावर मी काम करीत आहे, १९९० मध्ये मधमाश्यांची पोळी ही फक्त काटेरी झाडावर असायची यात साधी बाभूळ, बोर ही झाड महत्वाची होती, मात्र आजच्या काळात हीच पोळी काटेरी झाड सोडून जांभूळ, आंबा अश्या सहज शिकार होईल अश्या झाडांवर शिवाय घरात, भिंतीवर दिसू लागली, हा अतिशय महत्वाचा बदल दिसून येत आहे. हा बदल करण्यापाठीमागे कारण सुद्धा असेच आहे कि, आजकाल बोरी व बाभळी तोडण्याचे प्रमाण भयानक वाढत गेले आणि वास्तवात तर आता बोरी व बाभळी दुर्मिळ होत गेल्या, पर्यायाने त्यांनी आपल्या मूळ नैसर्गिक अधिवासात बदल करीत नवे पर्याय स्वीकारला केवळ माणसांच्या चुका मुळेच…

आग्या मधमाश्या तर जंगलातील उंच झाड कमी होत गेल्यामुळे शिवाय, नैसर्गिक पाणवठे कमी होत गेले, ज्यात या मधमाश्या सहज मातीत उतरून गाळात पाणी पिऊ शकत होत्या, आता हे पाणवठे नष्ट झालेत, यात काही वन अधिकार्‍यानी तर पर्यटकांना वाघ दिसावा म्हणून जंगलातील नैसर्गिक पाणवठे नष्ट केले आणि आता नवीन पाणवठे रोडलगत तयार करून वाघ दिसावा अशी व्यवस्था निर्माण केली, मात्र यात सिमेंटच्या टाक्या बांधल्याने त्यात मधमाश्या पाणी प्यायला उतरतात आणि बुडून मरतात. असे हे व्यवस्थापन कसे जंगल वाढविणार ?? या माश्यांनी आपला नैसर्गिक अधिवास बदलुन इमारती, मंदिरे अश्या जागा निवडून लोकवस्तीत प्रवेश केला, कारण पाणी सहज मिळू लागले शिवाय उसाची रसवंती हे सुद्धा महत्वाचे आहे कारण यात त्यांना उन्हाळ्यात गोड रस मिळत असतो.

आजकाल शिकलेल्या लोकांना मधमाशी काय करू शकते याच महत्व राहिलेले नाही. मात्र शेतीत अडचण आली कि, मग आपण सर्व पर्याय शोधत असतो, अगदी कालची गोष्ट आहे कि, माझा मित्र बंड्या याने सांगवी गावात ४ एकर जमीन घेतली असून, गेली अनेक वर्षे शेती हा व्यवसाय म्हणून करीत आहे. यात त्याने पाॅलीहाउस करून आधुनिक शेती करण्यास सुरुवात केली. अर्थात शेती घेतली त्यावेळी शेतीच्या बांधावर बोर, बाभूळ, जांभूळ, आंबा, शेवगा, भोकर, रुई अशी विविध झाड होती, मात्र इतरांचे ऐकून सर्व झाडे तोडली आणि जास्त पाणी पिणारी नारळाची झाडे बांधावर लावली, यात शेतीची जैव विविधता झपाट्याने कमी झाली हे लक्ष्यात आलेच नाही.

आता खरी गंमत अशी आहे कि, परवा त्याचा फोन आला कि, पाॅलीहाउसमध्ये काकडी लावली आहे आणि खूप मोठी पिवळी फुल येत आहेत आणि जळून जाताहेत शिवाय काकडी अंगठ्या एवढीच राहतेय, काय कराव लागेल ? मग आम्ही प्रत्यक्ष जाऊन, निरिक्षण केले आणि चर्चा करून निश्चित केले कि, या काकडीचे परागीभवन होत नाही. कारण या फुलात आत शिरून परागीभवन कोणीही करत नाही, त्यामुळे त्याचे पराग फुटत नाहीत आणि मग फुल जळून जात आहेत, मग यावर उपाय म्हणजे मधमाशाच जगात हे काम करू शकतात, मग बंड्याने खटपट करून मधमाश्यांच्या पेट्या अकलूजवरून घेऊन आला आणि त्याच रात्री दोन पेट्या पाॅलिहाउसच्या तोंडाजवळ ठेवल्या. सकाळी लवकर मधमाश्यांनी आपले परागीभवनाचे काम सुरु केले.

मनाला खूप बरे वाटले, मग ७ दिवसांनी बंड्याने आनदाने मला फोन केला कि, १ क्रेट ऐवजी आता ६ क्रेट काकड्या तोडल्या आणि शिवाय टवटवीत माल सापडला, २० किलो ची वाढ. म्हणजे १५ पटीने उत्पन्न वाढले याचा टक्केवारीत अर्थ काढायचा असेल, तर १५०० टक्क्यांनी वाढ झाल्याचे सांगितले. सचिन शिर्के म्हणजे बंड्या हा माझा मित्र सहज म्हणाला शिक्षणात कधी अस शिकवलं जात नाही, यापुढे मात्र पर्यावरण पूरक वृक्षारोपण करणार असल्याचे स्पष्टपणे बोलून दाखविले. अगदी शेतीच्या बांधावर बोरी, बाभळी, करंज, भोकर, उंबर, पिंपळ, कडुलिंब, जांभूळ अशी जैव विविधता पूरक झाडे लावणार असे कबुल केले.



अनेकजण सांगतात झाडांच्या सावलीमुळे पिकांना फटका बसतो. मात्र हे खोटे असून याऊलट आपल्या स्थानिक झाडांच्या पानांचे खतामध्ये लवकर रुपांतर होते, शिवाय सावलीमुळे काही फरक पडत नाही, मात्र परदेशी झाडे ऊदा. निलगिरी, गुलमोहर आणि नारळ झाडे बांधावर असल्यास भूजल पातळी झपाट्याने खोलवर जाते आणि यांची पाने जमिनीवर पडल्यास जमीन नापीक होत असते. त्यामुळे फक्त स्थानिक झाडेच शेतीच्या बांधावर लावली पाहिजेत.

काकडीचे परागीभवन करताना मधमाशी फुलात शिरून परागीभवन करीत असते आणि मग काकडींच्या वेलींची वाढही झपाट्याने होत असते, याचा अर्थ वेलीची वाढ जोरात होते आणि उत्पादन क्षमता वाढते ती पण कित्येक पटीने…काहीजण दिवसा कीटकनाशक फवारतात आणि मग मधमाश्या मरतात. यावर उपाय म्हणजे रात्री मधमाश्यांनी आपले परागीभवन काम थांबविले की फवारणी करावी, जर गरज असेल तरच..

अगदी जेष्ठ निसर्ग तज्ञ मारुती चितमपल्ली यांनी नागझिरा येते सांगितले कि, जंगलात अस्वले मधमाश्यांची पोळी व मध आवडीने खातात, त्याच्या भाकरी करतात, त्या करताना झाडांची पाने टाकतात आणि मग त्या सर्व भाकरी गुहेत ठेवतात कारण त्यांच्या पिल्लांसाठी उपयोगी येतील, मात्र काहीवेळा या भाकरी चोरायला आदिवासी लोक येतात आणि मग अस्वले त्यांच्यावर हल्ले करतात. अस्वलाचा हल्ला म्हणजे जगात सर्वात वाईट. चेहरा भेसूर होतो, कारण त्याची एक चापट म्हणजे चेहरा विद्रुपीकरणच.


एकदा त्यांनी एक अस्वल झाडावर चढत असल्याचे पहिले, ते झाडावर मधमाशी पोळे खाण्यासाठी झाडाच्या शेंड्यावर गेले आणि वरून खाली पडले आणि मेले याचा अर्थ असा आहे कि, त्या मध्यामाश्याच्या पोळ्यावर अनेकदा अस्वल हल्ले झाले होते आणि मग त्या पोळ्यातील राणीने आपल्यात बदल करीत झाड फांदी ऐवजी अस्वल आल्यावर फांदी सहज तुटेल अश्या फांदीवर आपले पोळे केले आणि यावर कायमस्वरूपी आग्या माश्यांनी उपयायोजना केली. ज्या प्रजाती बदलायला शिकतात त्याच निसर्गात टिकतात आता वेळ आहे मानवाला बदलायची, जर आपण आपल्या जीवनशैलीत बदल केला नाही, तर आपण सुद्धा संपणार यात शंकाच नाही, हे विशेष लक्षात घेणे आवश्यक आहे.

आपण सर्वांनी लक्षात घेणे गरजेचे आहे कि, यापुढील काळात स्थानिक वृक्ष लागवडीला प्राधान्य दिले पाहिजे. जेणेकरून आपली स्थानिक जैवविविधता वाढेल आणि जगण्यातील आनंद व समाधान वाढेल. मधमाश्या जगात टिकून राहण्यासाठी बदल करीत राहतील मात्र त्यांना आपणही साथ दिली पाहिजे, आता नाही तर पुन्हा कधीच नाही अस बोलण्याची वेळ आली आहे. सर्वांनी शाश्वत शेतीकडे वेळीच वळावे अन्यथा आपणही संपणार हे आता नक्कीच…! हा लेख डॉ. महेश गायकवाड यांनी लिहिला आहे.
मधमाशी सेवक, प्रगतशील शेतकरी – राहुल नवले (नाशिक)
मधमाशी पेटीसाठी संपर्क:
मधमाशी सेवक
रमेश नवले
मो. नं. 9359204587
राहुल नवले
मो. नं. 8999980785

संपादन – क्रांतीकुमार कडुलकर

संबंधित लेख

 


- Advertisment -

लोकप्रिय