समृद्धी महामार्गावर भीषण अपघात, वृद्ध महिलेचा मृत्यू; सहा जण जखमी

23 January 2025

0

Samruddhi Highway : महाराष्ट्रातील समृद्धी महामार्गावर भीषण अपघात घडल्याची घटना समोर आली आहे. या अपघातात एका वृद्ध महिलेचा मृत्यू झाला असून सहा जण जखमी झाले आहेत. नागपूर येथील लग्न समारंभ आटोपून वाशीमला परतत असताना ही दुर्दैवी घटना घडली.

हिग्ना पोलिस ठाण्याच्या हद्दीतील समृद्धी महामार्गावर, वेणा नदीवरील पुलाजवळ चालकाचे वाहनावरील नियंत्रण सुटल्याने कार दुभाजकावर जाऊन आदळली. या भीषण अपघातात कारमधील 67 वर्षीय आशा देवी रमेशचंद्र लाहोटी यांचा जागीच मृत्यू झाला, तर कारमधील अन्य सहा जण गंभीर जखमी झाले.

जखमींची नावे आणि प्रकृती (Samruddhi Highway accident)

अपघातात जखमी झालेल्यांमध्ये चालक रोहित लाहोटी, त्याची पत्नी टिळक लाहोटी (वय 32), रोशन लाहोटी (वय 35), विठ्ठल राठी (वय 45), दिनेश मालानी (वय 38) आणि त्यांची पत्नी सुनीता (वय 38) यांचा समावेश आहे. सर्व जखमींवर सध्या नागपूरच्या अखिल भारतीय आयुर्विज्ञान संस्थेत (AIIMS) उपचार सुरू आहेत.

दरम्यान, या अपघातामुळे महामार्गावर काही काळ वाहतूक ठप्प झाली होती. पोलिसांनी अपघातग्रस्त वाहन महामार्गावरून हटवून वाहतूक सुरळीत करण्यात आली आहे.