Free Chhaava Movie Screening : मराठा साम्राज्याचे दुसरे छत्रपती संभाजी महाराज (Chhatrapati Sambhaji Maharaj) यांच्या जीवनावर आधारित ‘छावा’ हा हिंदी ऐतिहासिक चित्रपट 14 फेब्रुवारी रोजी प्रदर्शित झाला. सुप्रसिद्ध लेखक शिवाजी सावंत यांच्या ‘छावा’ या मराठी कादंबरीवर आधारित असलेल्या या चित्रपटाची महाराष्ट्रात जोरदार चर्चा सुरू आहे. प्रेक्षकांचा उत्स्फूर्त प्रतिसाद मिळाल्यामुळे चित्रपटाने मोठी कमाई केली आहे.
अहमदनगरमधील आमदार संग्राम जगताप यांनी ‘छावा’ (Chhaava) चित्रपटाचे मोफत प्रदर्शन करण्याची घोषणा केली आहे. विशेषतः महिलांसाठी 17 फेब्रुवारी ते 23 फेब्रुवारी या कालावधीत हे मोफत स्क्रीनिंग आयोजित करण्यात आले आहे. या उपक्रमाद्वारे महिलांच्या मनात देशप्रेम आणि धर्मप्रेमाची भावना निर्माण होईल, असा विश्वास संग्राम जगताप यांनी व्यक्त केला आहे.
छत्रपती संभाजी महाराजांचे धैर्य, शौर्य, ज्ञान आणि कामगिरी लोकांपर्यंत पोहोचविण्याच्या उद्देशाने हा उपक्रम राबवला जात आहे. तसेच, आमदार संग्राम जगताप यांनी ‘छावा’ हा चित्रपट करमुक्त करण्याची विनंती केली असून, सर्व महाराष्ट्रीय नागरिकांनी हा चित्रपट पाहावा, असे आवाहन केले आहे.
Chhaava Movie Free Screening
या ऐतिहासिक चित्रपटाचे दिग्दर्शन लक्ष्मण उटेकर यांनी केले असून, मॅडॉक फिल्म्सच्या बॅनरखाली दिनेश विजान यांनी त्याची निर्मिती केली आहे. या चित्रपटात विक्की कौशल यांनी संभाजी महाराजांची भूमिका साकारली आहे, तर रश्मिका मंदाना यांनी येसूबाई आणि अक्षय खन्ना यांनी औरंगजेब यांची भूमिका निभावली आहे.
चित्रपटाच्या निर्मितीची तयारी एप्रिल 2023 मध्ये सुरू झाली, तर मुख्य चित्रीकरण ऑक्टोबर 2023 मध्ये सुरू होऊन मे 2024 मध्ये पूर्ण झाले. ‘छावा’ चित्रपटाच्या माध्यमातून छत्रपती संभाजी महाराजांचे कार्य आणि पराक्रम नव्या पिढीपर्यंत पोहोचण्याची मोठी संधी निर्माण झाली आहे.
हे ही वाचा :
महिलांसाठी कॅन्सर प्रतिबंधक लस पाच ते सहा महिन्यांत उपलब्ध होणार
छत्रपती शिवाजी महाराजांचे गडकोट होणार जागतिक वारसास्थळ
धक्कादायक : इंधनात ८०% पाणी २०% पेट्रोल मिसळून विक्री