जयश्री थोरातांवर भाजप नेत्याची आक्षेपार्ह टीका ; अहमदनगरमध्ये जाळपोळ

26 October 2024

0

Jayashree Thorat : संगमनेरमध्ये भाजप आणि काँग्रेस या दोन प्रमुख पक्षांमध्ये राजकीय वातावरण पेटलं आहे.संगमनेर तालुक्यातील धांदरफळ गावात काल 25 ऑक्टोबररोजी भाजपचे माजी खासदार सुजय विखे पाटील यांच्या युवा संकल्प मेळाव्यात भाजप नेते वसंतराव देशमुख यांनी काँग्रेस नेते बाळासाहेब थोरात यांच्या कन्या जयश्री थोरात यांच्याविषयी खालच्या पातळीवर आक्षेपार्ह वक्तव्य केले. या टीकेनंतर संगमनेरमधील राजकीय वातावरण अधिकच तापले असून काँग्रेस कार्यकर्ते आक्रमक झाले आहेत.

भाजप नेते वसंतराव देशमुख यांनी या सभेत बाळासाहेब थोरात यांच्या मुलीबद्दल आक्षेपार्ह वक्तव्य करण्यात आलं. “तुमच्या कन्येला समजवा, नाहीतर आम्ही निवडणुकीच्या काळात मैदानात उतरलो, तर तुमची मुलगी घराबाहेर पडणार नाही. सुजय विखे पाटील, त्यांना ताई म्हणातात. पण सुजयदादा या ताईचे पराक्रम सगळ्या तालुक्याला माहिती आहे.”, असं वक्तव्य भाजप नेते वसंतराव देशमुख यांनी केलं.

टीकेनंतर काँग्रेस समर्थकांनी विरोधाचा तीव्र सूर लावत शुक्रवारी रात्री शहरात ठिय्या आंदोलन केले. जयश्री थोरात आणि दुर्गाताई तांबे यांच्या नेतृत्वाखाली शेकडो काँग्रेस समर्थकांनी पोलीस ठाण्याबाहेर आंदोलन करत भाजप नेत्याविरोधात कारवाईची मागणी केली. यावेळी काही अज्ञातांकडून वाहनांची तोडफोड आणि जाळपोळ देखील करण्यात आली. रात्रीपासून सुरू असलेले आंदोलन तब्बल 7 तास चालले आणि पहाटे 5 वाजेपर्यंत दोन फिर्यादी दाखल करण्यात आल्या, तर तिसरी फिर्याद नोंदवण्याचं काम सुरू आहे.

या घटनेनंतर भाजप नेते सुजय विखे पाटील यांनी आपली भूमिका मांडली आहे. “मी जयश्री थोरात यांना ताई म्हणून संबोधलं, त्यामुळे महिलांचा सन्मान होणं गरजेचं आहे, असं सुजय विखेंनी म्हटलंय. तसेच,आमच्या गाड्या ज्यांनी जाळल्या त्यांच्यावर कारवाई व्हावी, अशी मागणी देखील सुजय विखे पाटील यांनी केली.

काँग्रेस नेत्या दुर्गाताई तांबे यांनी भाजप नेत्याच्या आक्षेपार्ह वक्तव्याचा तीव्र शब्दांत निषेध केला. “एकीकडे भाजप सरकार लाडकी बहीण योजना आणतं, तर दुसरीकडे महिलांविषयी असे अपशब्द वापरायचे,”असा तीव्र निषेध व्यक्त केला आहे.

संगमनेरमधील राजकीय वातावरण चांगलंच तापलेलं आहे.संगमनेरमधील या राजकीय संघर्षाने विधानसभा निवडणुकीच्या तोंडावर वातावरण अधिकच चिघळले आहे.