मोठी बातमी : NEET नंतर आता UGC NET परिक्षेत घोटाळा, एक दिवसापुर्वी झालेली नेट परीक्षा रद्द

20 June 2024

UGC NET : यूजीसी नेट परिक्षे संदर्भात एक महत्वाची बातमी येत आहे. यूजीसी नेट परीक्षा रद्द करण्यात आली आहे. शिक्षण मंत्रालयाने ही माहिती दिली आहे. शिक्षण मंत्रालयाने म्हटले आहे की 18 जून 2024 रोजी झालेल्या नेट परीक्षेचे पावित्र्य धोक्यात आले आहे. भारतीय सायबर क्राइम कोऑर्डिनेशन सेंटर (14C) ने दिलेल्या इनपुटनुसार हा निर्णय घेण्यात आला आहे. NEET प्रमाणे, UGC NET परीक्षा देखील नॅशनल टेस्टिंग एजन्सीद्वारे घेतली जाते.

NEET परीक्षा घोटाळ्याच्या मुद्द्यावर आधीच अडचणीत असलेल्या NTA साठी हा मोठा धक्का आहे. शिक्षण मंत्रालयाने बुधवारी, 19 जून रोजी ट्विट केले की, ‘गृह मंत्रालयाच्या अंतर्गत भारतीय सायबर गुन्हे समन्वय केंद्राकडून मिळालेल्या प्राथमिक माहितीच्या आधारे, 18 जून रोजी झालेली UGC NET 2024 परीक्षा रद्द करण्यात येत आहे. आता पुन्हा ही परीक्षा घेतली जाणार आहे. यूजीसी नेट परीक्षेच्या नवीन तारखेशी संबंधित माहिती ugcnet.nta.nic.in वर स्वतंत्रपणे प्रसिद्ध केली जाईल.

मंत्रालयाने म्हटले आहे की, ‘यूजीसी नेट परीक्षेतील गैरप्रकारांची चौकशी करण्याची जबाबदारी सीबीआयकडे सोपवण्यात आली आहे. परीक्षांचे पावित्र्य राखण्यासाठी आणि विद्यार्थ्यांचे हित जपण्यासाठी शासन कटिबद्ध आहे. नेट परीक्षेत हेराफेरीसाठी जबाबदार व्यक्ती किंवा संस्था आढळल्यास त्यांच्यावर कठोर कारवाई केली जाईल.

Government is committed to ensure the sanctity of examinations and protect the interest of students.

Ministry of Education has decided that the UGC-NET June 2024 Examination be cancelled on the basis of inputs from Indian Cyber Crime Coordination Centre (I4C) under the Ministry…
— Ministry of Education (@EduMinOfIndia) June 19, 2024

UGC NET

देशभरातील विद्यापीठांमध्ये पीएचडी प्रवेश, ज्युनियर रिसर्च फेलोशिप (जेआरएफ) आणि सहाय्यक प्राध्यापक पदासाठी UGC NET परीक्षा घेतली जाते. मंगळवारी 317 शहरांतील 1205 केंद्रांवर ही परीक्षा झाली. एकूण 9 लाख 9 हजार 508 विद्यार्थ्यांनी नेटची परीक्षा दिली होती.