जमिनीच्या वादातून महिलेच्या अंगावर घातला ट्रॅक्टर, महिलेचा जागीच मृत्यू

28 January 2025

0

Nashik : नाशिक जिल्ह्यातील अभोणा (Abhona) येथील गोळाखाल (Golakhal) येथे जमिनीच्या वादातून एका महिलेसोबत अमानुष कृत्य करण्यात आले. या घटनेत जिजाबाई पवार (वय 47) या महिलेच्या अंगावर ट्रॅक्टर घालून ठार मारण्यात आले. या भयानक घटनेने संपूर्ण परिसरात खळबळ उडाली आहे.

देविदास पवार यांनी आपल्या विधवा बहिणीच्या वाटणीतील दोन एकर जमीन आपल्याला मिळावी, अशी मागणी नातेवाईकांकडे केली होती. यावरून वाद उफाळून आला आणि संतप्त हेमंत सुरेश पवार याने जिजाबाई पवार यांच्या अंगावर ट्रॅक्टर घातला. या घटनेत गंभीर जखमी झालेल्या जिजाबाई पवार यांचा जागीच मृत्यू झाला.

घटनेनंतर आरोपी हेमंत पवार फरार

घटनेनंतर आरोपी हेमंत सुरेश पवार घटनास्थळावरून फरार झाला आहे. पोलिसांनी त्याच्याविरोधात खुनाचा गुन्हा दाखल केला असून, त्याचा शोध सुरू आहे. या घटनेचा पुढील तपास अभोणा पोलीस करत असून, आरोपीला लवकरात लवकर अटक करण्यासाठी विशेष पथक तैनात करण्यात आले आहे.

या घटनेमुळे संपूर्ण परिसरात खळबळ उडाली असून मृतक जिजाबाई यांच्या कुटुंबावर शोककळा पसरली आहे. ही घटना जमिनीच्या वादातून होणाऱ्या गंभीर गुन्ह्यांचे भयावह वास्तव उघड करत असून, अशा घटनांना आळा घालण्यासाठी कठोर उपाययोजनांची गरज आहे.