धक्कादायक : कामावरून काढल्याच्या रागातून मालकाची हत्या

23 January 2025

0

Mumbai : कामावरून काढून टाकल्याच्या रागातून तीन कामगारांनी मालकाची हत्या केल्याची धक्कादायक घटना ठाण्याच्या मुंब्रा येथील शिळफाटा परिसरात घडली आहे. या भयंकर घटनेत मालक सय्यद फैसल हुसेन (वय 42) यांचा जागीच मृत्यू झाला असून, त्यांचा साथीदार तौसिफ गंभीर जखमी झाला आहे. सध्या तौसिफवर मुंबईतील रुग्णालयात उपचार सुरू आहेत.

पोलिसांनी दिलेल्या माहितीनुसार, शिळफाटा परिसरातील खान कंपाऊंडमध्ये एक चायनीज कॉर्नर चालवणारे सय्यद फैसल हुसेन यांनी काही दिवसांपूर्वी आपल्या तीन कामगारांना चोरी करताना पकडले होते. या प्रकारामुळे फैसल यांनी त्यांना कामावरून काढून टाकले होते. कामगारांनी त्याचा राग मनात ठेवून फैसल यांच्याशी वाद घालण्यास सुरुवात केली.

प्राणघातक हल्ला (Mumbai)

वादावादीचे रूपांतर हाणामारीत झाले आणि संतप्त कामगारांनी धारदार शस्त्राने फैसल आणि त्यांच्या साथीदार तौसिफवर हल्ला केला. या हल्ल्यात फैसल यांचा जागीच मृत्यू झाला. तौसिफ गंभीर जखमी अवस्थेत असून त्याची प्रकृती चिंताजनक आहे.

घटनेनंतर पोलिसांनी तपास सुरू करून एका आरोपीला अटक केली आहे, तर इतर दोन आरोपींचा शोध सुरू आहे. या घटनेमुळे शिळफाटा परिसरात खळबळ उडाली आहे.